Email Newsletter icon, E-mail Newsletter icon, Email List icon, E-mail List icon Sign up for our Email Newsletter






     
 

ՀԱՄԱԶԳԱՅԻՆԻ «ՍՕՍ ՍԱՐԳՍԵԱՆ» ԹԱՏԵՐԱԽՈՒՄԲԸ ԼՈՍ ԱՆՃԵԼԸՍԻ ՄԷՋ ԿԸ ՆԵՐԿԱՅԱՑՆԷ ԹԱՏԵՐԱԿԱՆ ՆՈՐ ՓԱՌԱՏՕՆ

 

Համազգայինի Շրջանային Վարչութիւնը ուրախութեամբ կը տեղեկացնէ, որ անցեալ տարուան յաջողութենէն խանդավառուած եւ ընդառաջելով հանդիսատեսներու եւ աշակերտութեան փափաքին՝ այս աշնան եւս, եւ ի մասնաւորի մշակութային ամսուան ձեռնարկներու ծիրէն ներս, կազմակերպած է թատերական փառատօն, որուն իրականացման համար դարձեալ Հայաստանէն կը հրաւիրէ Համազգայինի Սօս Սարգսեանի անուան պետական թատերախումբը, հովանաւորութեամբ Համազգայինի Կեդրոնական Վարչութեան:

Փառատօնի կազմակերպական հսկայական աշխատանքը վստահուած է այս նպատակին համար յառաջացուած յանձնախումբի մը, որուն անդամները արդէն երկու ամիսէ ի վեր կը զբաղին ծրագրի պատրաստութեամբ: Աշխատանքը ներկայիս կը թեւակոխէ գործնական փուլ, որուն յաջողութեան համար յանձնախումբը կարիքը ունի ամերիկեան այս ափերու հայութեան նիւթական եւ բարոյական ներդրումին ու զօրակցութեան:  

Գանատա եւ Ամերիկաներ իր շրջապտոյտին ընթացքին թատերախումբը հանդէս պիտի գայ նոր խաղացանկով, որուն նպատակն է գոհացնել պատանի եւ չափահաս հայ հանդիսատեսներու մասնագիտական թատրոնի պահանջը եւ զարգացնել անոնց մէջ հայերէնով թատերական արուեստի ընկալման ճաշակ եւ վարժութիւն: 

Լոս Անճելըսի մէջ «Սօս Սարգսեան» թատերախումբը պիտի իրականացնէ 6-օրեայ փառատօն՝ Սեպտեմբեր 30էն Հոկտեմբեր 5: Գաղութիս հայկական վարժարաններու աշակերտութեան համար քանի մը օրերու վրայ պիտի ներկայացնէ մանկապատանեկան երաժշտախառն թատերգութիւնը՝ «Ամենալաւ տունը» (հեղինակ՝ Ռուբէն Մարուխեան), հանրութեան համար՝ «Փրկութեան Կղզին» (հեղինակ՝ Ուիլեըմ Սարոյեան) թատերախաղը, իսկ թատերական փառատօնի եզրափակումը պիտի կատարուի թատերա-համերգային իւրայատուկ ծրագրով մը՝ թատերախումբի դերասաններուն յղացմամբ եւ կատարումով:

Յայտնենք նաեւ, որ ընդառաջելով Լոս Անճելըսի հայկական վարժարաններու եւ անցեալ թատերաշրջանի ներկայացումներուն յաճախելու դժուարութիւն ունեցած մեծ թիւով հայորդիներու փափաքին, թատերախումբը այս փառատօնին եւս պիտի ներկայացնէ՝ ազգային կարեւոր խնդիր շօշափող «44 Աստիճանի Վրայ» թատերախաղը, երկրորդ առիթ մը ընձեռելով բոլորին:

Կը յուսանք որ մեր ժողովուրդը չի փախցնէր թատերական այս բացառիկ առիթը եւ հոծ բազմութեամբ ներկայ կ'ըլլայ վայելելու այս ներկայացումները, միաժամանակ քաջալերելով կազմակերպողներն ու խաղացողները, որպէսզի շարունակուին նման գործունէութիւններ, որպէսզի ապրի հայկական մշակոյթը:

Բոլոր ներկայացումները տեղի պիտի ունենան El Portal Theaterի մէջ, 5269 Lankershim Blvd., North Hollywood, CA 91601: Տոմսերու գիներն են $30 եւ $45: Աշակերտական ներկայացումները կ'արժեն միայն $15: Տոմսերու ապահովման համար հաճեցէք դիմել www.itsmyseat.com/Hamazkayin, հեռաձայն՝ (626) 869-7328, Համազգային՝ (818) 660-1207:

 

        ՀԱՄԱԶԳԱՅԻՆԻ ԱՐԵՒՄՏԵԱՆ ԱՄԵՐԻԿԱՅԻ      

            ՇՐՋԱՆԱՅԻՆ ՎԱՐՉՈՒԹԻՒՆ

 
     
Home |  About |  Scholarship Program |  Calendar |  Archives |  Get Involved |  Collaborations |  Contact
© 2011, Hamazkayin, Western United States. All Rights Reserved.